వివాహ బంధంలోకి అడుగుపెట్టిన కెవ్వు కార్తీక్

ప్రస్తుతం టాలీవుడ్ ఇండస్ట్రీలో పెళ్లి బజాలు మోగుతున్నాయి. స్టార్స్ హీరోహీరోయిన్స్ దగ్గర్నుంచి.. ఇతర నటీనటుల వరకు ఒక్కొక్కరు వివాహబంధంలోకి అడుగుపెడుతున్నారు. ఇటీవల టాలెంటెడ్ హీరో శర్వానంద్ ఓ ఇంటివాడయ్యాడు. ఇక ఇప్పుడు జబర్దస్త్ షో ద్వారా పాపులర్ అయిన కమెడియన్ కెవ్వు కార్తీక్ పెళ్లి బంధంలోకి అడుగుపెట్టారు. కెవ్వు కార్తీక్, శ్రీలేఖల వివాహం గురువారం హైదరాబాద్‏లో ఘనంగా జరిగింది. వీరి పెళ్లి వేడుకకు బుల్లితెర నటీనటులే కాకుండా.. పలువురు సినీ ప్రముఖులు కూడా హజరయ్యారు. జబర్ధస్త్ ప్రోగ్రామ్ ద్వారా తనకు అత్యంత ఆప్త మిత్రుడు అయిన గెటప్ శ్రీను సహా పలువురు కమెడియన్స్ హాజరయ్యి.. నూతన వధూవరులను ఆశీర్వదించారు.

కెవ్వు కార్తీక్ పెళ్లి ఫోటోలను సోషల్ మీడియాలో షేర్ చేశాడు గెటప్ శ్రీను. కొత్త దంపతులు జీవితాంతం సంతోషంగా ఉండాలని ఆశిస్తున్నట్లు తెలిపాడు. అయితే కెవ్వు కార్తీక్ గతంలో తన భార్య పేరును సిరి అని చెప్పగా.. ఇప్పుడు గెటప్ శ్రీను శ్రీలేఖ అని పేర్కొన్నారు. కెవ్వు కార్తీక్.. వరంగల్ అబ్బాయి. ఇంజనీరింగ్ పూర్తి చేసి మంచి ఉద్యోగంలో స్థిరపడిన కార్తిక్.. ఆ తర్వాత సినిమాలపై మక్కువతో ఉద్యోగం వదిలేసి సినీపరిశ్రమలోకి అడుగుపెట్టాడు. ఇప్పటికే టీవీషోలతో పలు సినిమాల్లోనూ నటించాడు.

గతేడాది విడుదలైన ముఖచిత్రం సినిమాలో కీలకపాత్రలో నటించిన కార్తీక్… ఇటీవల విడుదలైన నేను స్టూడెంట్ సర్ చిత్రంలోనూ కనిపించారు. ఇదిలా ఉంటే.. ఈరోజు సినీ పరిశ్రమలో మరో నిశ్చితార్థం కూడా జరుగుతున్న సంగతి తెలిసిందే. మెగా హీరో వరుణ్ తేజ్, లావణ్య త్రిపాఠిల ఎంగెజ్మెంట్ ఈరోజు హైదరాబాద్ లోని మెగా నివాసంలో అంగరంగ వైభవంగా జరగనుంది.